歡迎! | 简体 | 繁體

8/16/2007

介紹下自己先

見到另一個blog嘅超神父第一篇係介紹自己,我先醒覺,我都要寫番篇嘢介紹自己,你估好多人識你咩!

 

我花名叫「陳德雄」,至於真名,中學同喺堂區做仔嘅時候叫「大頭」,出嚟社會做嘢叫「大鼻」,喺修院嗰陣叫做「大眼」,沿用到今日!

 

點解我做神父,第一,因為我做唔到修女;第二,因為我喺屋企排第八,唔想結婚之後老婆被人叫「八婆」。(做咗神父之後我先知道,原來我排第八,喺輩份嘅稱呼上面,我老婆係唔會俾人叫「八婆」嘅!哎吔!)

 

嗜好?眼瞓嘅時候鍾意瞓覺,肚餓嘅時候鍾意食嘢,有波睇嘅時候鍾意睇波。

 

我最唔鍾意嘅,就係要我俾speech,致詞,要我正經咁講說話,出席嚴肅或者官式嘅聚會,做慶典主持,寫咩嘢「神父的話」、「校監的話」、「主席的話」之類嘅老套嘢!可惜以上嘅都係做神父時時要做嘅嘢!不幸!

 

講到我嘅專長,就係做Icon,寫笑話,講故事,變魔術呢一啲非神父應做嘅嘢!近年仲整呢樣整嗰樣嚟賣添!

 

Last but not the least,我依家係西灣河聖十字架堂主任司鐸。
-
回覆文章
神父o既產品直頭係人氣product啦~ 記得幫我留住呀~~ -- Rivalino


8/6/2007

教區青年節

八月五日嘅教區青年節,我睇到一啲可喜嘅現象:

 

首先我見到嘅參加者,多數都係生面口嘅,平均都較年輕;而以往曾參加青委活動嘅,今日就成為工作人員,由過往被服務,到今日服務他人!我主持嘅工作坊嗰一群義工,實在做得好!其他義工,一定都係!

 

唔少神父修女出席今次聚會,而且都係年輕嘅神父修女,至少心境上係!粗略計一計,大約二十個參加者就有一個神父或者修女。教區嘅青年工作,唔係靠三、兩個神父,而係要靠一班心境年輕,有心同青年同行嘅神父修女們,讓我哋繼續努力!

 

我因為要趕返堂區主持六點半彌撒,我未有參加最後嘅共祭彌撒,只係彌撒開始嘅時候企喺台下。我望住面前嘅一群青年,我期望教區青年節成為教區公教青年每年一次相聚嘅時刻,一齊分享、慶祝、加油!

 

我由堅道行落去坐地鐵,一路上,人離開了,心仍在明愛中心禮堂!

-
回覆文章
估唔到你都識打blog~神父你好in ar~ -- Cinderella


8/3/2007

廿年回顧

做神職人員就快二十年囉,比起其他鐸兄鐸弟,二十年話長唔長,話短唔短。點解我話係「做神職人員」,而唔係話「做神父」呢?當然係因為兩樣嘢有啲唔同,當我成為執事嗰一刻,我就係神職人員,而做神父就係再之後大半年嘅事。

 

有啲教友以為升神父那日子為我們很重要,所以有幫神父慶祝晉鐸週年紀念。其實,理論上應該係升執事嗰一日最重要,因為嗰陣時已經係決定性的一個時間,已經係一個神職,「永不超生」!

 

為一啲若干個十年前嘅抉擇,有啲人鍾意問:「如果俾你再揀,你會唔會揀番同一樣呀?」望番呢廿年,我嘅答案係「一樣」!不過,最好唔使做本堂神父!

 

有一次我哋一班較年輕嘅神父見主教,「較年輕」嘅意思係六十歲或以下,主教一見面就輕鬆咁問:「點呀!有乜嘢要求呀?」差唔多所有正在擔任本堂神父嘅不約而同一齊舉手,笑住話:「有呀!可唔可以唔做本堂呀?」當然嗰次我哋唔係為呢個目的而嚟,但同一口徑嘅答案正好反映我哋內心所想嘅!

-
frphilip 11:55:12 AM | 全文鏈接 | 引用(0)


上一頁,第1,..,75,76,77,78,79,80,81頁

所有文章

返回頁頂

Powered by Misslog 1.2 | Design by BlueYr