歡迎! | 简体 | 繁體

11/16/2007

好句!好句!

Faith in God sees the invisible, believes the incredible, and receives the impossible.
-
BigEyes 11:53:34 PM | 全文鏈接 | 引用(0)


11/15/2007

一個前輩嘅電話

昨日「年青」神父聚會,閒談間好多弟兄都話早上接到一位前輩神父嘅電話,佢已經八十幾九十歲。佢通知我哋一月晉鐸六十週年,教友為佢設宴慶祝,佢邀請我哋出席共祭同埋晚宴。
 
個個都弟兄都話,前輩老人家咁有心,逐個打電話俾我哋,唔去唔得。無錯!一定要去!
 
誠意贏嘥!
-
BigEyes 5:26:35 PM | 全文鏈接 | 引用(0)


11/14/2007

神父聚會

今日係每個月第二個星期三,又係神父聚會嘅時間,係「青鐸聚會」。乜嘢係「青鐸聚會」?
 
我哋香港嘅國籍教區神父有一個叫「國籍司鐸協會」嘅團體,可以話係一個神父嘅善會,簡稱三三三,因為我哋係每月第三個星期三下午三點鐘聚會。而「青鐸聚會」就係一班「年青」嘅教區神父,除咗上面所講嘅三三三之外,另外又喺每個月第二個星期三下午三點鐘聚會,因為後生神父有後生神父嘅話題。不過呢個由「年青神父」自發嘅聚會已經開始咗三十年,之後升神父嘅陸續加入,依家大多數都唔「年青」囉!
 
無論三三三抑或二三三,呢兩個聚會我都出席率好高,肯定係出席最多嘅三個神父之一!神父相聚,傾下偈,兄弟共聚,非常好!
-
BigEyes 11:11:55 PM | 全文鏈接 | 引用(0)


11/13/2007

好句!好句!

Faith will not always get for us what we want, but it will get what God wants us to have.

 

(我會經常在這裏和大家分享靈修好句,每次一句,讓大家慢慢消化!)

 

-
BigEyes 10:11:34 PM | 全文鏈接 | 引用(0)


11/12/2007

好句!好句!

分享兩句我喜歡嘅靈修佳句:(有關信德)

 

Faith is to believe what we do not see.  The reward of this faith is to see what we believe.

 

(本來打算 post 兩句,不過咁精句,都係一句先!)

-
BigEyes 10:50:40 PM | 全文鏈接 | 引用(0)


11/11/2007

St. Menas 瞻禮

今日係  St. Menas ( St. Mina ) 瞻禮,今晚晚禱嘅時候請記得佢,求佢轉禱。
 
如果唔知道或者唔記得 St. Menas ( St. Mina ) 係邊個,可以睇番我 28/10 至 2/11 嘅 blog.
 
我搵到另外兩張 St. Menas 圖片:
 
              
-
BigEyes 10:21:48 PM | 全文鏈接 | 引用(0)


11/10/2007

我今日嘅工作

今日食完午飯,去北角香港殯儀館主持殯葬禮,兩點出殯,去埋哥連臣角火葬場。三時半返西灣河聖堂,主持一台安息彌撒,亡者剛在加拿大去世不久,已辦完事,家人想香港做點事,讓親友表達思念。四點半堂區兩個聖母軍支團週會。六點半主持主日提前彌撒。八點半又到香港殯儀館主持另一個殯葬禮,他們選擇了星期日出殯,無辦法,只好星期六做。
 
今日為亡者做事多,主日彌撒都係有關死亡復活。都唔係奇怪囉!記得有一次,一日內主持三個葬禮一個婚禮(可能記錯,或者係三個婚禮一個葬禮)。
-
BigEyes 10:24:42 PM | 全文鏈接 | 引用(0)


11/9/2007

今日禮儀慶日

今日十一月九日,普世教會慶祝祝聖拉特朗大殿慶日,大家可能唔多覺,都唔多知,更加唔會有乜特別感受;其實今日呢個慶日係好有意思。究竟呢個節日同我哋有乜關係,又唔係我哋自己聖堂祝聖,你聖堂祝聖紀念日你都未知喇!拉特郎大殿(聖堂)係乜料?呢間聖堂並唔係最大,又唔係最靚,點解全世界各地方教會要慶祝佢嘅祝聖,反而聖伯多祿大殿、聖保祿大殿又唔係?
 
拉特郎大殿係喺四世紀由君士坦丁大帝所建,喺公元313年前,教會處於迫害同教難中,公元313年之後,自從君士坦丁大帝歸化,教會先得到自由。後來君士坦丁大帝起呢間聖殿,呢間可以話係全世界第一間被祝聖嘅教堂,因為之前教難嘛,點會有聖堂!所以呢一點已經係好特別,標誌住一個新時代嘅開始。
 
呢個慶典最初只喺羅馬舉行,後來因為佢係羅馬主教座堂,亦都係教宗嘅座堂(教宗十三世紀先至遷到梵蒂岡),所以被尊為「全球聖堂的母堂」,佢嘅紀念就推行到普世拉丁禮嘅教會。大約喺十二世紀,普世教會就喺今日慶祝佢嘅祝聖紀念,作為各地教會對聖座敬愛同團結一致嘅象徵。
 
呢間聖堂夠堅嘛? 
 
 
8/11/2007  (一時按錯,delete 咗
 
懷舊老餅歌
 
我去每個堂區都成立男人會,因為堂區一般善會為佢哋唔多啱。所以聖十字架堂都唔例外,我成立咗「聖十字架使徒會」,每月一次聚會,多元化形式及主題。
 
今晚剛聚會完,三十個男人,「懷舊老餅歌」之夜。開始嘅時候唱咗兩首短頌,一首奇妙救恩,唱到死死下咁;嘩!跟住唱英文老餅歌,即刻 high 蹝,幾大聲呀!佢哋話如果去聖堂唱啲歌好似呢啲咁就好囉!
 
你哋班後生仔女,唔明架喇!我哋一班中坑聚埋,唱番啲老餅英文歌,都唔知幾有共鳴,幾有 feel 。到你哋變成中坑嗰陣,如果大家聚埋一齊,都唔知有乜嘢歌可以一齊唱,懷舊一下,真係替你哋感到空虛!依家啲歌星,無論香港抑或外國,佢哋啲歌,一年半載之後,玩完囉!
 
我哋幾個月後相信會再來一次,如果你哋有興趣,我問下啲會友,俾埋你哋參加吖!叫埋你老豆嚟吖!
-
BigEyes 7:51:10 PM | 全文鏈接 | 引用(0)


下一頁,上一頁,第1,..,75,76,77,78,79,80,81

所有文章

返回頁頂

Powered by Misslog 1.2 | Design by BlueYr