夜神.嘻哈

5/15/2009

你係邊一種人呢?

要做一個幸福既人要有朋友。

阿里士多德話朋友有三種。

 

第一種 – Friendship of enjoyment

簡單d黎講就係酒肉朋友,一齊玩既朋友。

 

第二種 – Friendship of utility

幫到你,對你有用的朋友,

即係當你要搵人幫忙時,

係朋友既就會幫你。

 

第三種 – Friendship of goodness

因為佢好,所以好鍾意同佢一齊果d

 

係我地生活當中,其實三種朋友我地都有。

但係,如果只係有第一種,我相信你都會好開心,

不過開心過後,你又會唔會覺得有d空洞呢?

 

當所有朋友都當你係Friendship of utility

即係有事先黎搵你,無事不登三寶殿,

你都不免會覺得自己有d攰兼且空虛吧!

 

但如果你找到一種友情屬於Friendship of goodness

能夠有一種咁真摰的友誼

你一定會好開心,好充實

 

我地最好的朋友,莫過於係耶穌基督

佢係我地想同佢做朋友之前,佢已經首先揀選左我地

為左我地呢個朋友,甘願死係十字架上。

係最後晚餐既時候,佢再三勸勉我地要彼此相愛

我地又做到幾多呢?

 

正如阿里士多德的名言:

朋友就是 – One soul in two bodies.

能夠得一知己,我相信是福氣是緣份

 

-

5/11/2009

你今日「修」左未呀?

我地成日聽人講「修德立功」,咩係修德呢?

點解要修鍊德行呢?

修德可以讓我地遇到一d事既時候,

我地都唔需要再考慮,再去諗點樣反應,而係自自然然咁,

就會有一個合乎真理既傾向,修德唔單只係你理智上知道咁簡單,

而係深入到你既感覺裡面。咁就係修鍊!

 

 

好多時我地都知道某一d野係好,不過我地又唔去做,

其實都係冇用!

而基督徒的德行其實都係一樣!

 

靈修靈修,講既唔單只係得個「知」字,

好多人都知好多野,讀好多書,上教理班,番神學,各樣各樣‥‥

但係讀完之後,做唔做到呢?又係另一回事。

有冇一個傾向去做好呢?你個心有冇好想去做呢?

d唔係可以係書本上讀番黎的!我地唯有係修鍊番黎!

 

點修呢?

耶穌死而復活,俾我地一個希望,我地唔再怕死亡,唔再怕罪惡。

但係,到有事發生時,

你又會話:「天主點解你咁對我?我日日去望彌撒,去念經,

你咁對我,你點對得住我呀?」

如果你真係咁樣回應天主,

你學到既野其實都係得個「學」字,完全未入到去感覺果度。

 

我地要修鍊到好似保祿宗徒既說話

「你們應當喜樂!我再說一遍,你們應當喜樂!」

「我們應當時時喜樂,不斷祈禱,事事感恩!」

 

但係,如果一陣間突然撞車,咁又點呀?

仲事事感謝?

如果你真係相信聖經,我地的確要咁樣做!

所以修鍊就係要修呢d野。

學可以好快學完,但係「修鍊」就要修一世

要「修」到入去我地既感受裡面。

 

當有時發生時,我地既感覺都會好自然而言地,冇struggle咁,

去講:『天主,我感謝你!事事感謝!

因為呢個係一個救恩,係天主,袮愛我的表達。』

要有呢個感受,當然要花一世既時間去修鍊啦。

 

你今日「修」左未呀?

-

5/3/2009

上回講到

天主回應緊「約伯」嘅問題,

去到最後,天主好似冇俾約伯一個實質嘅答案,

究竟天主就係唔係停左呢,唔理約伯呢?

 

故事今次繼續‥‥‥

 

雖然天主咁樣對待同埋回應約伯,但約伯並冇背棄天主,

他自知自己渺小,但佢相信天主總有安排。

 

好明顯呢一個打賭,天主贏左漂亮的一仗!

因為約伯真係 - 無論環境順逆,疾病健康,

佢都永遠信賴佢嘅天主,對祂忠心耿耿。

所以,故事嘅發展就係‥‥‥

天主願意補償佢嘅一切,所有唔見左嘅一切都雙倍奉還,

有房,有屋,有地,有錢,連仔女嘅數目都係雙倍!

故事就係咁樣完結。

 

為我地黎講,呢個結局都唔錯啦,苦盡甘來!

好似我地成日聽到果種故事,「從此以後,他們就快快樂樂地生活下去!」

但係,我地又唔明,點解要經歷咁多,先「從此」快快樂樂‥‥

可唔可以從「開始」就快快樂樂嘅呢???

個個都好想問呢個問題,

但係又唔係好敢問,因為深怕我地問嘅時候,

天主又會話我地:「你有資格問咩!」^^ ha ha~

 

但係,係耶穌身上係有答案!

天主要我地係佢身上去搵呢d答案!

 

點搵呢?有一種方法係要從讀經之中去搵,

我地叫佢做「聖經頌讀」。

 

但係當我地讀聖經嘅時候,又會覺得好困難,

所以我地要留心,我地要時時記住聖經唔係要我地去明白d咩,

而係讓我地走去耶穌基督果度。

聖經最大嘅好處就係當我地讀經之後,有機會可以同耶穌傾下計,

一傾計,耶穌就會親自同我地講佢嘅答案。

 

呢一種經驗為過隱修生活的人,係比較容易得到。

「聖經頌讀」就加強佢地同耶穌傾計嘅經驗,

因此亦加強佢地嘅信仰。

但係呢一份經驗係好難用言語去表達,同人分享,

因為佢地會形容 - 好似同天主結婚,同佢親吻,

咁樣講,為未準備好嘅人,係好難人接受,而且又容易令人誤會,

所以當要去傳福音既時候,就會揀一d有豐富圖象,

又可以係日常生活之中經驗到嘅故事,

同人分享,讓人係祈禱同埋讀經之中,

得到呢份同天主關切的經驗。

 

所以,當我地平日遇到不如意嘅事,人生嘅難題,

當我地想問天主點解時,我地可以係耶穌身上去搵答案,

係讀經當中,同耶穌傾計,進入一份深切的經驗。

只要我地好好咁讀經,可以從圖像,就好似「約伯傳」的故事,

去明白人可以點樣面對痛苦,

最終以呢d傳奇故事來提高人對天主的愛。

 

-

4/26/2009

天主最喜歡我地做咩呢?

天主最喜歡我地做咩呢?

係讀佢嘅說話!但係,個個都覺得讀聖經好困難!

 

所以,我地要將佢同生活拉上關係。

有冇d出名的讀經方式係一路流傳至今,

又可以同自己嘅生活拉上關係呢?

當然有啦!

 

講之前,不如講一個故事先啦!

約伯嘅故事,一個試探人嘅故事。

 

約伯同基督有好多肖似的地方,佢受好多苦,又試過俾人蝦。

你知佢俾邊個蝦呢?

係天主同埋魔鬼(試探者)

佢一下子d仔女死晒,一下子佢所有嘅財物又燒晒,

突然之間,佢嘅身體又出現問題。

 

故事裡面,就係咁講,佢錢又冇,人又冇,仲病埋。

究竟佢做錯咩事呢?

問題就係佢冇做錯事。咁天主點解容許呢件事發生呢?

 

睇起上黎好似一個打賭,

因為試探者覺得天主錫約伯,又俾咁多嘢佢,

約伯梗係咁聽天主話啦,佢唔回報天主就假啦!

試探者於是就同天主講:「你試下俾我掂下佢呀!

天主就應承左:「好!我就俾晒d權你!」

 

於是,約伯就變左果個被試探的對象!

一下子,咩都冇,親人死晒,家財冇晒,連健康都攞埋。

約伯嘅朋友黎探佢,

就同佢講:「你一定係暗啞底做左d壞事啦!」

約伯就話:「我點講俾你聽呢,我真係冇做到!」

朋友又講:「你一定有做,你唔駛唔認。如果唔係,你點解會有咁慘的遭遇?」

約伯就話:「我唔同你講。同你層次唔同,我講你都唔會明。」

 

於是,佢就同天主講:「我嘅朋友唔明,係層次唔同,

但係天主你唔同佢地,你咩都知架!」

約伯開始問天主點解自己會咁。

天主就開始答佢:「束起你的腰,好似一個勇士,上主要在旋風中說話‥‥」

 

於是,約伯就好謹慎咁,乖乖地聽天主同佢講咩。

究竟天主俾左個咩答案呢?

 

天主就同佢講:「你有資格去問我呢個問題咩?

我創造天地的時候,你係邊度?我做大鱷的時候,你係邊度?

有大象出現的時候,你係邊度?你係邊度?」

「我做嘢要問過你嘅咩?你有資格問我呢點咁高層次的問題咩?」

 

約伯跟住就話:「係嘅!係嘅!我都唔應該問‥‥‥

既然我係赤身露體咁黎,我都係應該赤身露體咁番去,

你都冇欠我,我都真係唔應該問。」

 

睇到呢到,個答案好似懸空左,冇一個實質嘅答案。

咁天主係唔係就停左係呢道呢?

究竟呢個聖經故事,同我地的生活又點樣拉上關係呢?

 

下次再講‥‥‥

 

-

4/18/2009

我係一部錄音機?

包含要謀求對方的好處

 

我好鍾意人地講d好聽嘅說話俾我聽,尤其係我低落嘅時候。

如果係呢個時候,我遇到一個朋友,

佢又同我講佢屋企人點難為佢,佢個男朋友又點點點,咁我仲煩!

但係如果我遇到一個朋友,佢話:「嘩,你好叻呀,又勁呀,好醒‥‥」

咁我成個人就會醒晒!咁多幾個呢d人就仲好添!^^

但往往事又唔係咁,俾麻煩你嘅人就多個讚美你,

仲要話:「你又唔點,你又差‥‥」

於是我就發明一個方法,就係錄音。

仲要調較唔同的聲音,有d男聲,女聲,細佬仔,老人‥‥

一開出黎,就XXX你又叻,XXX你又靚,句句都好聽嘅說話

將成個人谷起,飄飄然,

如果我真係咁呢,呢個人都真係‥‥

不正常,簡直就係‥‥黐線~

 

好~ 如果做一個類比‥‥

當我地話:「天主,我愛祢,我讚美祢,我全心一意去事奉祢‥‥」

如果 天主真係當我係果d錄音機,

大家都係錄音機,一齊去讚美佢,咁天主又係唔係又有d問題呢?

即係佢自戀到一個‥‥無可救藥的地步。

所以 天主係唔會咁!

 

就好似我地都唔會有一個咁樣嘅錄音機

我希望我d朋友,有個關懷嘅心,

送幾句好聽嘅說話俾我,就係咁簡單。

係就出於一個愛心,出於佢嘅自由

唔係我迫佢嘅,唔係好似錄音機咁冇得選擇,

我錄咩音,佢就俾咩我聽。

 

如果天主Will(要)所有人愛佢,係唔成功。

呢一個愛,係一個假裝嘅愛,我地不由自主,

我地就變左錄音機!

因為冇自由就係一個錄音機

 

 

所以天主係Desire(渴求)我地去愛佢,

天主渴求人接受祂對我地嘅愛情,天主俾左我地有自由去選擇愛唔愛佢。

 

咁‥‥你選擇左咩呢?

你又有冇迫人做你嘅錄音機呢?

-

4/6/2009

如果教宗落難會做咩?

如果教宗有一日落難荒島,你估佢會做d咩?

佢會帶兩本書,因為時間多左,可以慢慢睇。

一本我相信大家都已經估到 係聖經,咁另一本係咩呢?

 

要知道教宗本篤做神學很喜歡去聖奧思定度搵靈感,

咁你知道聖奧思定寫過咩書嗎?

佢當然寫左好多書,不過有一本大家都應該聽過,

就係「懺悔錄」

 

 

 

係懺悔錄嘅第一章已經寫到:

我的心如果不安息在祢懷中,便不會平靜。

聖奧思定好恨可以去到主果度,

因為佢話自天主創造我哋嘅時候,天主已經係朝住呢個方向來做我哋,

所以佢覺得如果唔能夠去到,佢好似仲係差左d嘢。

而當聖奧思定寫呢本書嘅時候,佢好感謝天主。

 

因為佢呢個人好傲慢,花花公子一名,

但係佢又叻又醒,真係好似咩都得,分分鍾睇你唔起。

正因為佢咁,佢媽媽(Monica)就好擔心,但係又冇佢乎,

不過好彩奧思定仲有一d孝心,

當佢阿媽苦口婆心叫佢唔好做d唔好嘅事時,

佢都會聽‥‥‥少少嘅。^^

所以當奧思定要去歐洲,(佢哋當時住係北非)

Monica就向天主求恩典,希望個仔唔好離開佢,

因為Monica心想:係佢視線範圍都攪成咁,俾佢遠走高飛仲得了。

但係天主並冇照佢嘅祈禱咁做。

 

又係上主嘅安排

雖然天主唔照Monica嘅意思,但唔代表天主唔理佢。

反而,到最後俾左一份連Monica都估唔到咁大嘅禮物。

就係‥‥‥

奧思定遇到佢嘅師父 - 聖安博,讓佢得到皈依,

悔改,領洗,仲番去自己嘅鄉下,仲做埋主教。

 

頭先講緊點解要帶呢本書 懺悔錄

聖經唔夠咩?

 

聖經係好多個受到天主默感的人所寫,

所以讀佢地所寫嘅嘢,可以讀到天主嘅意思。

但係受天主默感嘅人,將天主的意思寫係紙上,

奧思定就將寫係紙上嘅嘢寫係自己心上,

心靈之上。

 

所以聖言嘅目的地並唔係紙上,

最重要係寫係我地心頭之上

-
下一頁,上一頁,第1,2,3,4

返回頁頂

Powered by Misslog 1.2
Design by BlueYr