夜神.嘻哈

9/8/2009

9月天 – 開學篇

滿以為不用上學的日子,會有多點時間做平日想做的事。

可以多看點自己有興趣的書,休息一下,無聊一番。

可惜,事實往往並不如此。

但,當中我看到天主更好的安排,雖說辛苦,卻十分值得。

這就是天主的工作 – Opus Dei.

 

上星期開始上課,不再是宗一班的我們,

課堂仍不失歡笑,我心感滿足和快樂!

仍然要感恩地再說一次:

「能夠與這班同學一起走這信仰與理性的旅程,

實在是天主的恩賜,也是我們的緣份。」

 

很多時候,我們都希望為自己計劃最好的一份,

選擇讀什麼科目,然後入那間大學,做一份怎樣的工作,

與那些人作男/女朋友,建立一個怎樣的家庭‥‥‥

一切就好似要在我們的掌握之中。

萬一,其中一項失落了,我們便會頓時覺得不知所措,

甚至灰心喪志。

閱讀更多內容...

-

7/7/2009

裝載盛載

第一年的學習終於走到尾聲,

三個學期的課堂,

功課、考試仲有Seminar

少一份心力,少一份體力,少一份腦力,

都恐怕不能完成。

當然,在天主前沒有不能的事。

 

今年學左好多,我最喜歡呢兩個字:

裝載」,「盛載」。

裝載天主的愛情

裝載神妙的慈恩

盛載著無限豐富的情義

盛載著天主的真光

 

真是載得滿滿!

天主從來都唔會同我地計住計住,

佢唔會睇我們值幾多,佢先俾幾多。

佢就好似小朋友去買糖果咁,總係想將個透明膠袋裝滿佢。

所以係咁「畢」,係咁「畢」,

「畢」到滿,就仲想開第二個袋去再裝過。

 

天主,我地相信,每一樣都是袮親自「夾」落黎我地度。

 

同學冇得頂,老師又勁又有型。

班房雖細小,滿載歡笑樂消遙。

番學又放學,同學揸車接送囉。

團結亦合群,有人變左大紅人。

功課同考試,一齊準備有意思。

年紀各不同,從無代溝極共融。

 

只能借吳神父既車牌一用:

AMDG - ad majorem Dei gloriam (耶穌會的箴言)

讓我們繼續努力「愈顯主榮」!

 

-

6/21/2009

聖體小故事

上星期係聖體聖血節,

係講道之中,神父講左一個有關聖體嘅小故事,好想同大家分享。

 

 

有一日,一個小朋友係聖堂,佢問神父:

「神父,老師話聖體就係耶穌嘅身體,點可能架?」

神父就問佢:「小朋友,你琴日食左d咩?」

小朋友就好開心仲摸下個肚腩仔咁話:

「琴日爸爸同我地食自助餐,食左好多嘢,好好味架!」

神父就繼續問佢:「咁,呢d嘢食,而家係邊呀?

小朋友就好得戚咁答:「當然係我個肚入面啦!」

於是神父就講:「你食左d嘢落肚,佢地就成為你身體嘅一部份。

咁同樣,呢個麵餅祝聖左之後,

佢都可以成為耶穌基督嘅身體啦!」

小朋友諗諗下又覺得幾有道理,不過,

佢又諗唔明另一樣嘢。

 

 

於是,又問神父:

「神父,咁,耶穌基督咁大個,佢應該高過我同大過我啦,

又點可以哩埋係個咁細細嘅麵餅到呀?」

「小朋友,你宜家望出去,你睇到d咩?」

「我睇到好大嘅天空,有好多樹,好多花,

仲有個好大,大到睇唔盡嘅海!」

「咁,你係點睇到架?」

「哈哈,神父你咁都唔知,就係用眼睇law!」

神父笑咪咪咁話:「你隻眼咁細細,都可以睇到咁

廣闊嘅視野,咁耶穌雖然好大,但佢都係係聖體內啦!」

 

 

小朋友聽完又點點頭,但係,個樣就仲係心事重重,

神父就問佢,

「你係唔係仲有野唔明呀?你問啦‥‥‥」

「我明白麵餅祝聖後,就成為耶穌基督嘅身體,

而耶穌基督就係聖體內,但係聖堂有咁多人一齊領聖體,

唔通耶穌識得分身,可以同時係幾百人的身體裡面?」

神父就帶小朋友去到空地,神父打爛左一塊大鏡,

問小朋友,「你見到咩?」

「我見到好多個我呀!」

「咁你攞起一塊爛左嘅小鏡,你又見到咩?」

「又我見到一個我!」

「小朋友,耶穌就好似呢塊大鏡,未爛嘅時候,照到整個你,

爛左嘅時候,每一個小塊同樣都照到整個你。

耶穌聖體都係一樣。」

 

 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

雖然我地再唔係小朋友,

而且好可能已經恭領左好多次耶穌聖體,

但係,小朋友問果三條問題,我地又答到幾多呢?

 

耶穌基督建立聖體聖事,是要我地紀念佢,

紀念佢對我地嘅愛,愛到連自己嘅命都唔要。

所以每一次我地「食這餅、飲這杯」,

並唔係單單「食」同「飲」,

而係讓耶穌基督進入我地嘅心中,

讓我地再一次感受呢一份愛到底嘅愛。

 

所以今個主日,都讓我地試下感受,

呢個大大嘅耶穌係我地細細嘅心中

-

6/11/2009

你識得佢地嗎?

如果要用一樣野黎代表你自己,你會用咩呢?

我相信呢個遊戲好多人都曾經玩過,

你又用左d咩黎介紹你自己呢?

 

其實除左遊戲,好多時我地都會用一d野去代表自己,

最常見莫過於「相片」。

MSN, Facebook, Xanga, profile當中總有一個特別位置,

好多人都喜歡放張相入去,

d放自己鍾意既野,有d放自己認為最靚既一面,

d放自己最近的生活照,有d放自己的背影‥‥‥

無論係d咩,佢都係代表緊你,

等人地一見到呢樣野就諗起你。

 

咁你又知唔知,佢係邊個?

 

 

 

仲有呢d,你又同佢地熟唔熟呢?

 

 

 

 

估唔到我地有icon,佢地都唔執輸!^^

想認識下佢地?可以去呢個網址,慢慢睇。

http://www.catholicdesktops.com/

 

 

 

~~~~~~~~~~~~~~~~~~~~~~~~~~~~~~~~~~~~~~~~~

雖然我地每一個人都係獨特,

但係係天主創造天地萬物既時候,

「天主於是照自己的肖像造了人。」

我地個樣都係肖似佢架!

 

今日番到屋企,不妨花少少時間,

照下鏡,睇下自己幾時,或者係邊方面,

同我地在天上的爸爸最相似。

 

 

資料來源:http://www.catholicdesktops.com/ (鳴謝靜儀分享^^)

-

6/1/2009

呢d人

嘩你仲咩剪個咁嘅頭?d人話今年最興架‥‥‥

你又話唔鍾意睇呢d戲?d人話好睇嘛‥‥‥

攰就番屋企瞓啦,仲去蒲?費事俾d人話我冇義氣‥‥‥

「呢d人」究竟係邊個?佢地姓咩名咩?

 

其實我地真係唔知「呢d人」係咩水,

佢地唔係一班可以指名道姓既人,反而就係模模糊糊,

總之佢地講嘅嘢可以話係 - 所謂嘅「公眾意見」。

 

可能你覺得以上嘅對話好好笑,

但問心,你有冇會心微笑先?

 

我地好多時都鍾意同人比較,

人地讀理科,我讀文科,我就係水皮果個?

人地拎LV,我拎個布袋,我就會俾人睇唔起?

人地攪個活動有成百人,我果個得10個參加者,我真係好冇用?

 

呢個世界發出好多唔同的聲音,

我地就係唔係跟住呢d聲音生活呢?

 

神父分享左一個好好的例子:

有一日佢係某名校看見旁邊起左一幢新的樓,

上面有一個廣告寫住:

The Address Reflects who you are!

你的價值就係咁樣俾個地址決定了嗎?

 

生活係呢個充滿唔同價值觀的環境下,

我地有冇好好尋求事實的真確性同埋根源呢?

定係往往流於表面,受制於「呢 d人」呢?

 

讓我地都呼求聖神來到我們心中,

好使這真理之神來引導我們,

真正去認識各種價值,同埋對自己嘅認識。

 

-

5/21/2009

我個名有咩特別?

聖道明 沙維豪 Domenico Savio一個好靚既名字

正如聖道明佢自己講,既然呢個係我個名,

我更加要努力,用盡我的一生的力量,去活出呢一切。

佢個名有咩特別意思?我暫且唔講住,哈哈!

 

好多時,我地都覺得聖人既事蹟離我地好遠,

佢都死左咁鬼耐,時移世易,我地仲有咩可以學?

而且佢食鹽,多過我食米,人生閱歷多,又見過世面,

佢梗係做到啦!

 

不如,我地睇下佢既故事再講。

 

有一個好熱的下午,有幾個同學約埋道明一齊去河中游水,

因為地勢的問題,附近的河流,河水又深又急,

好容易發生意外,而且係佢地果個時代,去河邊游水屬於傷風敗德既事。

道明唯有用盡方法叫佢地唔好去,但係d同學就係唔聽。

道明就同佢地講:「果度好危險架,隨時會冇命!

而且神父都再三吩咐我地唔好去果度,你地仲話要去?」

同學就講:「咁宜家就係好熱ma唔通你唔怕熱咩?

道明答佢:「宜家既熱你地都忍唔到,

唔通你又可以受得住係地獄永遠既火咩?」

同學聽到之後,當然回心轉意,跟道明走。

 

佢地梗係走啦,俾我都走啦!=P
雖然道明此舉好似有d恐嚇成份,但係正正佢講既都係事實。

我地又有冇呢份勇氣,有冇呢份醒覺呢?

 

又有一次,道明獨自回家,因為路途遙遠,

佢行到天都就黎黑,都仲行緊,

係路上,佢撞到一個人,果個人問佢:「小朋友,你一個人唔怕咩?」

你知唔知道明,一個十一、二歲既男仔,佢會點答呢?

道明答佢:「我唔驚!我都唔係一個人行。」

聽完,到個途人仲驚!唔係ma,心諗呢度仲有人咩?

道明再答佢:「因為護守天使時時都同我一齊!

 

我地仲記唔記得,我地每個人身邊都有一個護守天使相伴左右嗎?

我地又係唔係對天主時時滿懷信心呢?

 

聖道明既一生仲有好多好多感人、超凡、驚險既故事,

同我地的生活正正相似。

要記得,聖道明死既時候,不過係十五歲,

雖然時間短暫,但係佢卻係有限既時間,

樂中事主!修德成聖!

 

就正如佢既名字一樣

Domenico – 解:屬於天主的

Savio – 解:智慧

 

 

係時候諗下我地個名,或者,

天主早已係我地個名上埋下佢對我地的安排,

想知道要點做先得?

聖道明 沙維豪俾你一個超過100分既示範。

 

常懷喜樂!善盡本份!關懷同伴!立志成聖!

-
下一頁,上一頁,第1,2,3,4

返回頁頂

Powered by Misslog 1.2
Design by BlueYr