夜神.嘻哈
6/21/2009
聖體小故事

上星期係聖體聖血節,

係講道之中,神父講左一個有關聖體嘅小故事,好想同大家分享。

 

 

有一日,一個小朋友係聖堂,佢問神父:

「神父,老師話聖體就係耶穌嘅身體,點可能架?」

神父就問佢:「小朋友,你琴日食左d咩?」

小朋友就好開心仲摸下個肚腩仔咁話:

「琴日爸爸同我地食自助餐,食左好多嘢,好好味架!」

神父就繼續問佢:「咁,呢d嘢食,而家係邊呀?

小朋友就好得戚咁答:「當然係我個肚入面啦!」

於是神父就講:「你食左d嘢落肚,佢地就成為你身體嘅一部份。

咁同樣,呢個麵餅祝聖左之後,

佢都可以成為耶穌基督嘅身體啦!」

小朋友諗諗下又覺得幾有道理,不過,

佢又諗唔明另一樣嘢。

 

 

於是,又問神父:

「神父,咁,耶穌基督咁大個,佢應該高過我同大過我啦,

又點可以哩埋係個咁細細嘅麵餅到呀?」

「小朋友,你宜家望出去,你睇到d咩?」

「我睇到好大嘅天空,有好多樹,好多花,

仲有個好大,大到睇唔盡嘅海!」

「咁,你係點睇到架?」

「哈哈,神父你咁都唔知,就係用眼睇law!」

神父笑咪咪咁話:「你隻眼咁細細,都可以睇到咁

廣闊嘅視野,咁耶穌雖然好大,但佢都係係聖體內啦!」

 

 

小朋友聽完又點點頭,但係,個樣就仲係心事重重,

神父就問佢,

「你係唔係仲有野唔明呀?你問啦‥‥‥」

「我明白麵餅祝聖後,就成為耶穌基督嘅身體,

而耶穌基督就係聖體內,但係聖堂有咁多人一齊領聖體,

唔通耶穌識得分身,可以同時係幾百人的身體裡面?」

神父就帶小朋友去到空地,神父打爛左一塊大鏡,

問小朋友,「你見到咩?」

「我見到好多個我呀!」

「咁你攞起一塊爛左嘅小鏡,你又見到咩?」

「又我見到一個我!」

「小朋友,耶穌就好似呢塊大鏡,未爛嘅時候,照到整個你,

爛左嘅時候,每一個小塊同樣都照到整個你。

耶穌聖體都係一樣。」

 

 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

雖然我地再唔係小朋友,

而且好可能已經恭領左好多次耶穌聖體,

但係,小朋友問果三條問題,我地又答到幾多呢?

 

耶穌基督建立聖體聖事,是要我地紀念佢,

紀念佢對我地嘅愛,愛到連自己嘅命都唔要。

所以每一次我地「食這餅、飲這杯」,

並唔係單單「食」同「飲」,

而係讓耶穌基督進入我地嘅心中,

讓我地再一次感受呢一份愛到底嘅愛。

 

所以今個主日,都讓我地試下感受,

呢個大大嘅耶穌係我地細細嘅心中

siuwan   1:27:44 AM 
本文引用通告(trackback)URL:

6/22/2009
好多時候,我地都變得只求安守本份,每個星期返聖堂,每個星期望彌撒,每個星期領聖體!根本我地都未認真諗清楚我地自己係度做緊咩野!
 
小朋友問神父既果三題問題,的確令我反省,諗清楚我每星期做緊既究竟係乜野一回事!
 
謝謝妳既分享呀,小允!
daibo   Email  Web  14:02

 

返回頁頂

Powered by Misslog 1.2
Design by BlueYr